開荒南野際，守拙歸園田

小時候最喜歡的詩人是陶淵明，想不到今天我歸園田居。
這輩子第一次有自己的花園啊，我總是喜歡坐在園中間發呆。

以往不解一些人嗔窮，卻有着最新款的手提電話。現在開始明白，雖然歸隱田園聽似簡單純真的願望，背後需要龐大的財力支持。有句話說種下一棵樹最好的時機在十年前，其次是現在。不過種樹之前，首先得有地啊。

一個新款手機超過一部洗碗碟機的價錢，洗碗碟機立時提高不少生活質素，手機新款還是舊款，卻對生活質素影響不大，比利時許多人都還用着摔不爛的電話。不過要買一個放得下洗碗碟機的厨房呢，嘿嘿，就遠不止手機的價錢了。所以香港人愛買新手機，大概是因為，已經不抱希望買到放置東西的空間了，手機可以隨身攜帶，即使居無定所，還是擁有可以握在手心的小確幸。 

手機唔小心跌爛咗，本來打算去市中心搵舖頭整。腦裡盤算一次，要泊車喺邊，要俾泊車錢俾幾耐，泊完車之後行路定搭巴士入城好？咁遠水路入城一次特登為咗整手機，又唔知要幾多錢整，唔知間舖開唔開，唔知整唔整到，諗來諗去，覺得好麻煩啊。於是決定網購個芒同工具，自己整，貪得意將個黑芒換做白色。好次做外科手術咁，清潔一次周邊環境先，拆芒，拆home button，拆鏡頭，再逐件裝返。裝完之後開唔着機，都爭啲放棄，當花錢買個教訓算了。點知叉完電之後竟然又滿血復活返喎。諗起以前俾錢搵人換電池，其實換電池比起換芒簡單好多。

講真極度唔想俾錢蘋果賺，因為佢地喺非洲剝削童工採礦。但手機點都要用，無辦法。

住郊區，每次出城都要計劃周詳，要一次過去辦好幾件事先化算，唔可以再好似以前咁開着個爐發現無蒜頭拿拿臨落街買。

唔舒服，又未嚴重到自己行唔郁要人地車我去睇醫生，但諗起要揸車出去，又覺得好麻煩。睇家庭醫生無得做新冠測試，要佢寫紙俾你再去醫院測，度度都要開車去，諗諗下都係攤返喺張梳化算了。

呢啲就係歸隱田園嘅少少唔方便，但總體都係郊區好住得多。