我諗，作為朋友，係咪應該同佢解釋一下理財概念呢？
但其實，佢又生存到喎，喺歐洲福利國家生活，有必要儲蓄咩？
佢鍾意整嘢食，成日請人食飯，人緣極好，所以有時啲濕濕碎碎嘅賬單殺到埋嚟，總係有人幫佢搞掂。
萬一佢失業，或者病咗，有失業救濟攞，入醫院保險又會幫佢埋單。
佢住公屋，呢世人應該都唔會打算買樓，亦都無必要。阿女將來如果讀大學都會有政府津貼，學費減免。老咗又會有退休金。
我呢啲隨時諗住唔撈嘅，先要儲錢啫。如果佢唔介意做到六十五歲退休，儲錢嚟做咩？
可能佢呢啲先至叫做遵守耶穌教訓：（馬太福音 6：26）飛鳥不撒種，不收割，也不在倉房裏儲糧，你們的天父尚且養活牠們，難道你們不比飛鳥貴重嗎？
雀仔今日食今日捉到嘅蟲蟲，聽日又出去捉過。即係餐搵餐食餐餐清。儲錢反而係唔夠信心嘅表現。
