有個細路女做嘢唔專心，無恆心，唔鍾意思考。咁有人送咗個3D砌圖俾佢，啱晒啦，仲訓練埋圖像思維同想像力，手眼協調添。點知佢一收到，阿媽第一時間同佢掉咗個盒同說明書，話阻埞喎。得返一堆木塊，連完成圖係點樣都唔知，齊唔齊又唔知，咁點砌呀？仲要個女砌緊嘅時候，個阿媽喺佢面前開着個電視，梗係專心唔到啦。憑空想像，我都砌咗半個鐘都砌唔到，更何況細路女？咁做阿媽嘅自己都唔用腦諗嘢，好難要求個女咖喎。
又有人批評阿女見乜就想買乜，其實都係阿媽嘅翻版，佢都係洗錢唔用腦，無預算嘅。
國外中餐館啲父母成日批評啲仔女唔肯講中文，仲特登叫佢地出嚟好似睇熊貓咁睇阿范，驚嘆佢啲中文咁好，仲識讀識寫，想叫啲仔女自愧不如。喂，唔係佢地嘅錯嚟咖，你自己諗吓點解你教唔識佢地中文啦。成日淨係識搵錢，見到啲仔女淨係識叫佢地做功課考試，同埋鬧佢地，又唔同佢地傾偈同玩，佢地咪最多學識你鬧佢嗰幾句囉，點會有興趣學呀。
雖然，我都見過醫生父母生嘅仔有啲呆笨，吸毒媽生個聰明乖女，嗰啲應該係罕見例子啩。大部份細路，尤其係青春期之前，都係好誠實咁反映緊父母嘅行為同思考模式。
做父母就唔好再責怪小朋友呢樣嗰樣，你地自己諗吓你立咗啲咩榜樣啦，好心。
