埃塞俄比亞餐

屋企樓下開咗間埃塞俄比亞餐廳。第一次同爸媽去，得我地一枱客，老闆好似導遊咁，熱情介紹埃塞嘅風土人情。

佢話，埃塞有歷史最悠久嘅基督教文化，咁我地隨即諗起腓力同個埃塞俄比亞宦官啦。點知唔係喎，佢話埃塞嘅基督教已經有2500年歷史喎，即係仲早過耶穌？任佢講啦。埃塞的確係有深厚歷史文化，有自己一套獨立文字系統。

餐枱上無刀叉食具，除非你問佢攞，預咗大家用手食。

跟餐會送一隻幾特別嘅包，好似蛋卷咁，打開捲啲嘢食擺落口。老闆親手示範點樣包，然後佢話，埃塞俄比亞人食嘢呢，會將第一啖俾最重視嘅人食，跟手塞咗落阿范個血盆大口度。

佢地兩夫婦一齊開餐廳，老公做樓面，老婆做廚房，感覺上女仔煮嘢食乾淨啲。

第二次去係食自助餐，算幾抵食，有六樣熱菜，幾個沙律。肉類只得豬同雞，算啦呢個價錢，唔可以食人隻車。其實識食呢，叫一兩樣自己鍾意嘅，應該好食過自助餐，無必要食咁多。

全場除了我地之外，全部都係埃塞俄比亞人同佢地嘅伴侶。埃塞俄比亞人輪廓好分明，同其他非洲人唔同，好容易認，都幾多靚仔靚女。唔通全部都係靠老闆自己啲親戚朋友嚟支持小店？阿范話驚佢執笠，得閒多啲嚟，算援助吓埃塞俄比亞經濟。應該好過捐錢俾慈善機構，鼓勵人自力更生好過派綜援嘛。聽講話非洲經濟好大程度係倚賴旅居外地嘅非洲同胞寄錢返去。