文化差異

*** yb11 第88 頁 巴布亞新幾內亞 ***
約翰（特德）·休厄爾是來自澳大利亞的新分區監督。在大會前三天，他跟博博吉商量大會的籌備工作。
特德直問：“你建好了甚麽？”
博博吉回答説：“甚麽都沒建好。”
特德大聲説：“博博吉，今天是星期四，星期天就要舉行大會了！”
博博吉説：“弟兄，沒問題。我們可以在星期六把所有事情做完。”
特德嚇呆了。他回去莫爾兹比港，心想這次大會肯定會是一團糟。
那個星期天，特德憂心忡忡地駕車來到海馬，想看個究竟。結果令他大吃一驚！他看見一大塊空地，空地前有一棵大樹，樹下放着一個木造的堅固講台。遠處有幾個煮食坑，上面放着熱烘烘的石頭，烤着豬、沙袋鼠、鹿、鴿子、魚、芋頭和番薯。柴火上放了用來燒水的茶壺。除此之外，還有一個用木搭蓋的食堂。人們一群一群地聚在食堂裏愉快地交談，而博博吉就泰然自若地站在人群中。這一切使特德不禁嚇了一跳！

*** 2015年1月31日 比利時 ***

參加非洲人婚宴。

歐洲人有啲氣憤覺得一團糟，我覺得，還可以啦，可能非洲人覺得好正常。

下午四點大部份賓客已入場先至試咪，其實都無乜嘢。音樂時有時無。有個「表演」係四個人同時擺手揮毛巾和轉圈，有點似幼稚園唱遊，於是有啲賓客忍唔住加入去跳，竟然跳得比表演者更好。

等到幾乎餓死終於可以去拎嘢食，全部嘢都乾錚錚，無汁。食完去攞第二轉，多咗好多好嘢食。第三轉，有啲非洲傳統發酵食物，我好奇攞咗嚿細嘅試吓，有個非洲人勸阻我，話我唔食得，另一個人話，俾我試吓喎。結果又酸又苦，好似發咗霉（應該係真係發咗霉），難食到飛起，汁辣死。四周圍望吓，好多人都食剩大半無食到，包括非洲人。

我地被臨時拉伕去看管禮物和禮金，袋又無，箱又無，只係攤晒喺枱面。有啲細路好曳，借啲意係附近玩，我地一路食飯一路昅實佢地。阿范一路食雞一路係細路手上搶返啲禮金，搞到信封上都係汁。有啲禮金信封本來就好似係褲袋拎出來咁，唔係我地整皺。有個攝影師成日坐在禮物側邊，形跡可疑。

歌唱表演咪音色差，又無打燈，女歌手本來唱得唔錯，不過企喺暗角，沒太多人注意到。有一個非洲舞表演，舞者着運動服，一隻襪橙色，一隻襪灰色，時不時有人歡呼喝彩。我唔係好明，問非洲人，佢話，表達一個故仔呀，跳得幾好呀。

結婚蛋糕推咗出來，孤獨咁企係度二十分鐘無人問津。新郎新娘切咗一份自己食。與此同時在另一邊廂甜品推出，大家去嗰邊排隊攞，無人理個結婚蛋糕。

場地喺安特衛普，應該由本地人主辦，但本地人被邀請咗去跳舞表演（印度舞表演不錯看），反而遠道而來唔知頭唔知路的根特人婚宴當日才驀然發現自己係宴席主管，咁好明顯無預謀啦。據聞會場最多可容納二百人，不過睇落似有三四百，連宴席主管都唔知有幾人，即係無人知啦。

吃飽飯，又沒咩音樂，我悶極無聊，見吧台無人，入去幫手洗吓杯。無乾抺布，問宴席主管，佢話，無辦法喎。洗完杯，問隔離，擺邊呀？佢話，唔知喎，佢都係臨時頂上。遊蕩入去厨房睇睇，有個人拿着一大盤未郁過法式蛋餅話，丟咗佢洗兜囉，於是我搶救咗返來，打包帶返屋企。已經有一大袋可憐的飯俾人丟咗。

凌晨一點，早已好眼瞓，好想返屋企，大半賓客已經走咗。大半枱椅已摺好棟埋一邊，無人知道應該擺邊。同行友人話，唔知佢地點收科喎，我話，無眼睇咁仲唔快啲走？佢又氣憤又擔心，我話，唔使咁擔心啦，佢地會自己執生咖啦。呢個時候新娘綁起咗條裙襬走咗入廚房執嘢，我見到Ｏ咗嘴。我地唔知啲嘢要執去邊，幫唔到手，心急都無用。

仲有啲人跳緊舞，唔捨得走。唔理啦，等佢地跳完舞自己收拾囉。後來聽講佢地兩點半走，走前拖咗地喎。

我覺得係有組織嘅人眼中會覺得一塌糊塗，係不嬲都無組織嘅人眼中會覺得習以為常吧。請帖上已寫明到兩點咯，三點清場都預咗咖啦。