桎梏之下

學生寫論文，嗔搵唔到資料，不得不老作。我問佢，咩論文咁撩棱，點會無資料呀？

佢俾咗個題目我，谷歌一搜，大把啦，學術文章又有，普通網又有，英語以外其他語言自動翻譯過來的都有。

原來佢喺國內，百度搜唔到。

真慘。想翻牆連工具都下載唔到，Skype又登入唔到。叫咗佢咖啦，返去之前又唔裝定先。

唔怪得國內會出現Translate server error嘅招牌囉，谷歌翻譯都無咁渣啦，九成係百度翻譯嘅傑作。

佢識英文都仲好少少，見到多少少嘢。第日大陸取消英文必考，啲人唔學英文，仲更加容易俾人蒙蔽同控制。