活著就是為咗各種體驗，各種吃喝玩樂，到處旅遊。如果邊度都唔去咩都唔做，活着有咩意義呢？
都係老老實實去返工啦。
下個禮拜返新工，心情頗緊張。請我寫Java & C++，我有咩可能識得寫呢？總之我簽咗張賣身契，唔識都要識咖嘞。難得新老細信我會學得識，咁我就一定要學得識。
我無論如何短期內都唔想再搵工了，搵工真係好辛苦，幾廿百樣嘢可以學，都唔知應該由咩學起，學咗又唔知點證明畀人知我學咗，又唔知係咪真係會搵到工，用得着。所以只有簽咗約呢，我先可以安心同專心咁學佢要嘅嘢。
呢間公司好得意，個部門阿頭72歲，本來退咗休，得閑無聊貪玩走返來寫程式。估計呢間公司啲曲應該寫得好靚，唔係意粉曲。之前同人改曲睇到我暈，何只意粉，長壽麵添呀。
幸好搵到RyiSnow嘅遊戲教程，寫咗兩個遊戲，登時對OOP的概念熟習咗好多，開始有返些少信心。
原本教程裡係單人遊戲，我將佢改咗做雙人。然後隨機出磚嘅演算法改善咗，七輪裡每一款磚都必定會出現一次，避免咗等條條等到完蛋嘅情況。
原本教程裡嘅設計，物件之間冇分得好清楚，導至加玩家時啲變數撈亂晒。研究咗幾日，消耗咗唔少朱古力先寫到出嚟。我將佢大執完之後，啲曲簡潔易明咗好多，以後如果想再加玩家都會好容易。開講都有話寫曲要好似寫小說咁條理分明，寫詩咁簡潔。
寫到出嚟嗰下真係好開心，好有成就感。感覺兩個禮拜內學識咗多年以來有聽過但冇明白過嘅概念。實踐真係最好嘅學習方法。
寫完第一個俄羅斯方塊後，寫第二個遊戲就容易咗好多。啲圖係RyiSnow度借嘅，個教程跟咗一陣間我就自由發揮了。又係加一個玩家，撞到怪獸會死，攞晒啲寶石就過關。
地圖係糰仔設計嘅，數字０到５代表泥草水牆樹屋，佢整地圖都玩得好開心。佢整咗三張地圖，所以總共有三關，就打爆機。對啲小朋友嚟講都有啲難度，糰仔好勇咁衝出去，一唔小心就畀怪獸食咗，妹妹就驚到暱埋喺牆角唔夠膽行出嚟。
印象中大學開放日時參觀計算機系同學嘅畢業功課都差唔多係咁樣之嘛。
